កូរ៉េខាងជើងលួចធ្វើព្យុហយាត្រាយោធាស្ងាត់ៗ ហាក់ចង់បិទបាំងអ្វីមួយ

61

ព្យុងយ៉ាង៖កូរ៉េខាងជើងពិតជាបានធ្វើព្យុហយាត្រាយោធាមួយក្នុងទីក្រុងព្យុងយ៉ាង កាលពីយប់ឈានចូលថ្ងៃព្រហស្បតិ៍នេះប្រាកដមែន ដើម្បីរំលឹកខួបលើកទី៧៣ នៃថ្ងៃបង្កើតប្រទេសរបស់ខ្លួន។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ដកស្រង់ចេញផ្សាយដោយទីភ្នាក់ងារព័ត៌មានយ៉ុនហាប់នៅថ្ងៃទីទី១០ ខែកញ្ញា ឆ្នាំ២០២១។

បើតាមទូរទស្សន៍រដ្ឋកូរ៉េខាងជើង KCNA លោក គីម ជុងអ៊ុនក៏បានចូលរួមជាអធិបតីនៅក្នុងការធ្វើព្យុយាត្រយោធាខាងលើផងដែរ តែលោកមិនបានថ្លែងសុន្ទរកថាអ្វី នោះទេ ហើយ KCNA ក៏មិនបាននិយាយពីអាវុធយុទ្ធសាស្ត្រថ្មីណាមួយ ដែលត្រូវបានដាក់តាំងបង្ហាញក្នុងព្រឹត្តិការណ៍នេះដែរ។

កូរ៉េខាងជើងបានធ្វើព្យុហយាត្រាចុងក្រោយបំផុតកាលពីខែមករា ឆ្នាំ២០២១កន្លងទៅនេះ តែប៉ុន្មានថ្ងៃប៉ុណ្ណោះមុននឹងលោក ចូ បៃដិនស្បថចូលកាន់តំណែងជា ប្រធានាធិបតីអាមេរិក ដោយបានបញ្ចេញប្រភេទមីស៊ីលបាលិស្ទីគបាញ់ចេញពីនាវាមុជទឹកស៊េរីថ្មីមួយ។

កូរ៉េខាងជើងត្រូវបានគេរាយការណ៍ថានៅតែបន្តអភិវឌ្ឍ មីស៊ីល និងអាវុធនុយក្លេអ៊ែរ បើទោះជាកំពុងជាប់ទណ្ឌកម្មសេដ្ឋកិច្ចពីអន្តជាតិ ជាពិសេសពីសហរដ្ឋអាមេរិក៏ដោយ៕