ឥណ្ឌា ព្រួយបារម្ភអំពីច្បាប់ការពារព្រំដែនថ្មីរបស់ចិន ដែលទើបតែអនុម័ត ចំពេលស្ថានភាពព្រំដែនកំពុងតានតឹង

161

ញូដេលី៖ ក្រសួងការបរទេសឥណ្ឌាបានថ្លែងពីការព្រួយបារម្ភអំពីច្បាប់ថ្មីដែលប្រទេសចិនទើបតែអនុម័តដាក់ឲ្យប្រើប្រាស់កាលពីពេលថ្មីៗនេះ ពាក់ព័ន្ធនឹងវិធានការពង្រឹងការការពារព្រំដែន ចំពេលប្រទេសយក្សអាស៊ីទាំងពីរនេះ កំពុងប្រឈមដាក់គ្នាយ៉ាងរ៉ាំរ៉ៃនៅតាមតំបន់ព្រំដែនហិម៉ាឡៃ។

បើតាម Reuters កាលពីថ្ងៃសៅរ៍សប្តាហ៍មុន ប្រទេសចិនបានអនុម័តច្បាប់ពិសេសមួយស្តីអំពីរបៀបគ្រប់គ្រង និងការពារព្រំដែនគោកប្រវែង ២២,០០០ គីឡូម៉ែត្រ ដែលបែងចែកជាមួយប្រទេសជិតខាងចំនួន ១៤ប្រទេស រួមជាមួយប្រទេសរុស្ស៉ី  និងកូរ៉េខាងជើងជាដើម។

នៅក្នុងសេចក្តីថ្លែងការណ៍ អ្នកនាំពាក្យក្រសួងការបរទេសឥណ្ឌា លោក Arindam Bagchi បានលើកឡើងថា “ការសម្រេចចិត្តឯកតោភាគីរបស់ចិនក្នុងការនាំមកនូវច្បាប់ដែលអាចមានផលប៉ះពាល់លើការរៀបចំទ្វេភាគី ពិសេសលើការគ្រប់គ្រងព្រំដែន ក៏ដូចជាបញ្ហាព្រំដែន គឺជាកង្វល់របស់យើង” ។

សូមជម្រាបថា ព្រំដែន​ប្រវែង ៣.៥០០ គីឡូម៉ែត្រ​រវាង​ឥណ្ឌា និង​ចិន​នៅ​មិនទាន់បាន​កំណត់​ ច្បាស់លាស់​នៅឡើយទេ  ហើយ​ប្រទេសជិតខាងទាំងពីរនេះ ​បាន​ទាមទារ​តំបន់ត្រួតស៊ីគ្នា​លើ​តំបន់​ធំៗ​នៃ​ទឹកដី​តាម​បណ្តោយ​ព្រំដែន ខណៈដែលកន្លងមកប្រទេស​ទាំង​ពីរ​បាន​ធ្វើ​សង្គ្រាមទាមទារទឹកដី​តាម​ព្រំដែន​តាំងពីឆ្នាំនៅ​ឆ្នាំ​១៩៦២មក។

មកទល់ពេលនេះកងទ័ពឥណ្ឌា និងចិនរាប់ពាន់នាក់ក៏នៅតែបន្តមានវត្តមានប្រមូលផ្តុំនៅតាមព្រំដែនភ្នំហិម៉ាឡៃដាច់ក្នុងតំបន់ Ladakh ដែលជាទីតាំងធ្លាប់ផ្ទុះអាវុធដាក់គ្នាកាលពីថ្មីៗនេះ បើទោះបីជាមានការចរចាគ្នាជាច្រើមដងរួចមកហើយក៏ដោយ៕