ថៃ៖ក្រុមហ៊ុនដឹកជញ្ជូនមួយរបស់ថៃគ្រប់គ្រងដោយរដ្ឋគ្រោងនឹងមានរថយន្តក្រុងរត់លើផ្លូវ ២ខ្សែមកកម្ពុជា ខណៈក្រុមហ៊ុនដឹកជញ្ជូននេះ ក៏ត្រៀមនឹងចាប់ផ្តើមមានរថយន្តក្រុងចំនួន ១០ខ្សែពីប្រទេសថៃ ទៅកាន់ប្រទេសឡាវ ចាប់ពីថ្ងៃទី១៥ ខែមិថុនា ឆ្នាំ២០២២ ខាងមុខនេះ ។
នេះបើយោងតាមការចុះផ្សាយនៅលើគេហទំព័រ Nation Thailand កាលពីថ្ងៃទី២៨ ខែឧសភា ឆ្នាំ២០២២ ថ្មីៗនេះ ។
លោក Sanyalux Panwattanalikit ប្រធានក្រុមហ៊ុនដឹកជញ្ជូន អោយដឹងថា ផ្លូវរត់ថ្មីចំនួន ៩ទៀតនឹងត្រូវបន្ថែមទៅផ្លូវមុដាហាន-សុវណ្ណាខេត ជាលើកដំបូង តភ្ជាប់ពីប្រទេសថៃទៅកាន់ប្រទេសឡាវ ខណៈផ្លូវនេះគ្រោងនឹងបើកដំណើរការចាប់ពីថ្ងៃទី១៥ ខែមិថុនា ហើយសម្រាប់សំបុត្រនឹងមានលក់នៅគ្រប់ស្តង់ Transport Co នៅទូទាំងប្រទេស ។ ផ្លូវទាំង ៩ខ្សែនោះ រួមមាន ណងខៃ-វៀងច័ន្ទ, ឧដុង្គ-វៀងចន្ទន៍, ខនកែន-វៀងច័ន្ទ, បាងកក-វៀងច័ន្ទ, នគរភ្នំ-ថាក់កុក, ឈៀងរ៉ៃ-បរកែវ, លាវ-ហ្លួងព្រះបាង ជាដើម ។
ជាមួយគ្នានេះដែរ ផ្លូវរថយន្តក្រុងចំនួន ៣ខ្សែផ្សេងទៀត ទៅកាន់ប្រទេសឡាវ ពីឈៀងម៉ៃ ទៅលួងព្រះបាង ពីបាងកក ទៅប៉ាក់សេ និងពីណាន់ ទៅលួងព្រះបាង និងរថយន្តក្រុង ២ខ្សែទៀតមកកម្ពុជា គឺ ផ្លូវទី១ ពីបាងកក ទៅអារញ្ញប្រាថេត ទៅប៉ោយប៉ែត ទៅសៀមរាប និងផ្លូវទី២ ពីបាងកក ទៅអារញ្ញប្រាថេត ទៅប៉ោយប៉ែត ទៅភ្នំពេញ ប៉ុន្តែផ្លូវទាំងនេះ ខាងក្រុមហ៊ុនមិនទាន់បញ្ជាក់អំពីការបើកដំណើរការនោះ ទេ ។
លោក Sanyalux Panwattanalikit ប្រធានក្រុមហ៊ុនដឹកជញ្ជូន បន្ដែមថា បច្ចុប្បន្ន ក្រុមហ៊ុននេះបើកដំណើរការរថយន្តក្រុង នៅលើផ្លូវចំនួន ១៤ខ្សែនៅភាគខាងជើង និង២៤ខ្សែនៅភាគឦសាន និងខាងកើត ហើយ ១៣ខ្សែទៀតនៅភាគខាងត្បូងប្រទេសថៃ ។
សូមជម្រាបថា សម្រាប់អ្នកមានកាតសមាជិកចំពោះផ្លូវក្នុងស្រុក នឹងទទួលការបញ្ចុះតម្លៃ ៥% ក្នុងនោះចំពោះសិស្ស និងមន្ត្រីក្រសួងដឹកជញ្ជូនមានការបញ្ចុះតម្លៃ ១០% ខណៈក្រុមហ៊ុននឹងផ្តល់ការបញ្ចុះតម្លៃដល់ប្រជាពលរដ្ឋ ដោយផ្អែកលើលក្ខណៈវិនិច្ឆ័យដែលកំណត់ដោយនាយកដ្ឋានដឹកជញ្ជូនផ្លូវគោក ផងដែរ ៕
