គោលការណ៍ជោគជ័យទាំង១០ នៃម្ចាស់សៀវភៅ “Rich Dad Poor Dad”
អាមេរិក៖Robert Kiyosaki គឺជាអ្នកនិពន្ធសៀវភៅស្តីពីហិរញ្ញវត្ថុដែលមានចំណងជើងថា “Rich DadPoor Dad” គឺជាប្រភេទសៀវភៅដែលមានការពេញនិយមគ្រប់សម័យកាល។
គាត់ក៏ជាអ្នកជំនួញ អ្នកវិនិយោគ អ្នកនិយាយជំរុញទឹកចិត្ត សកម្មជនដែលមានចំណេះដឹងខាងផ្នែកហិរញ្ញវត្ថុជនជាតិអាមេរិកផងដែរ ។
គាត់គឺជាស្ថាបនិកក្រុមហ៊ុន Rich Dad Company ហើយគាត់មានតម្លៃទឹកប្រាក់សុទ្ធសរុបប្រហែល ៨០លានដុល្លារអាមេរិក។
គាត់បានធ្វើឲ្យមានការប្រជែង និងផ្លាស់ប្តូរនូវវិធីសាស្ត្ររបស់មនុស្សរាប់រយនាក់នៅជុំវិញពិភពលោក។ តាមរយៈសៀវភៅរបស់គាត់ដែលមានចំណងជើងថា “Rich Dad Poor Dad និង “Cash Flow Quadrant”ដែលជាគ្រឹះដ៏សំខាន់សម្រាប់ការចាប់ផ្តើមជាសហគ្រិនភាព។
ខាងក្រោមនេះ គឺជាគោលការណ៍កំពូលទាំង ១០ចំណុចរបស់ Robert Kiyosaki ដើម្បីភាពជោគជ័យ ៖
១.បទពិសោធន៍ធ្វើឲ្យអ្នកកាន់តែឆ្លាត
Robert Kiyosaki ចាប់ផ្តើមធ្វើអាជីវកម្មដោយមិនមានលុយច្រើនដូចមនុស្សភាគច្រើននោះទេ ហើយការវិនិយោគរបស់គាត់មានទំហំទឹកប្រាក់តិចតួច គឺ ១៨,០០០ដុល្លារ ដែលស្ថិតនៅក្នុងរដ្ឋហាវ៉ៃ ដែលធ្វើឲ្យគាត់រកចំណូលបានត្រឹមតែ២៥ដុល្លារប៉ុណ្ណោះក្នុងមួយខែ។ ទោះបីជា គាត់រកលុយមិនបានច្រើនពីការវិនិយោគនោះក៏ដោយ ក៏រៀងរាល់ពេល Robert Kiyosaki រកចំណូលបានពីការវិនិយោគផ្សេងមួយទៀតបាន ផងដែរ។ គាត់កាន់តែឆ្លាតជាងមុន ពីព្រោះបទពិសោធន៍ធ្វើឲ្យអ្នកកាន់តែឆ្លាត។ ដូចដែលបានលើកខាងដើមថា បទពិសោធន៍ពិតជាគ្រូដ៏ល្អបំផុត។
២. អ្នកផ្តល់ឲ្យកាន់តែច្រើន អ្នកទទួលបានកាន់តែច្រើន
Robert Kiyosaki ជឿជាក់ថានៅក្នុងគោលការណ៍របស់គម្ពីរប៊ីបនិយាយថា “អ្នកផ្តល់ឲ្យកាន់តែច្រើន អ្នកទទួលបានកាន់តែច្រើន”។ មនុស្ស ខ្លះចង់ទទួលបានច្រើន ប៉ុន្តែពួកគេមិនដែលផ្តល់អ្វីនោះទេ។ ប្រសិនបើអ្នកចង់បានលុយច្រើន អ្នកចាំបាច់ត្រូវធ្វើការឲ្យបានច្រើន និងផ្តល់ឲ្យ បានកាន់តែច្រើន។
៣. ផ្លាស់ប្តូរវិធីដែលអ្នកគិត
វាពិតជាមានសារៈសំខាន់ណាស់ដែលត្រូវផ្លាស់ប្តូរវិធីដែលអ្នកគិតអំពីអ្វីមួយពិតប្រាកដ ហើយត្រូវបង្កើតឥរិយាបថវិជ្ជមានឲ្យបានច្រើន។ ឧទាហរណ៍ ៖នៅខណៈពេលដែលអ្នកជំនួញភាគច្រើនមានឥរិយាបថអវិជ្ជមានចំពោះអ្នកប្រមូលពន្ធ Robert Kiyosaki ប្រើប្រាស់ឥរិយាបថនេះជាគ្រឿងលើកទឹកចិត្តដើម្បីរកលុយឲ្យបានច្រើនបន្ថែមទៀត។
៤. ត្រូវមានការផ្តោត
យោងទៅតាម Robert Kiyosaki ពាក្យថា “FOCUS” តំណាងឲ្យឃ្លា “អនុវត្តតាមទិសដៅមួយរហូតដល់ទទួលបានជោគជ័យ-Follow One Course Until Successful”។ នៅពេលណាមួយដែលអ្នកចាប់ផ្តើមធ្វើដំណើរលើផ្លូវរបស់សហគ្រិន អ្នកត្រូវតែស្ថិតនៅតាមទិសដៅនេះ ហើយនៅតែផ្តោតលើគោលដៅរបស់អ្នក។
៥. ពេលវេលាដែលពិបាកនាំឲ្យមានឱកាសកើតឡើង
ទោះបីជាការឡើងចុះនៅក្នុងសេដ្ឋកិច្ចពិភពលោកអាចធ្វើឲ្យមនុស្សមួយចំនួនមានការធ្លាក់ទឹកចិត្តក៏ដោយ ក៏វានៅតែមានសារៈសំខាន់ដែលត្រូវចងចាំថា ពេលវេលាដែលពិបាកអាចនាំឲ្យមានឳកាសថ្មីៗកើតឡើង។ Robert Kiyosaki រកលុយបានជាច្រើនតាមរយៈការវិនិយោគក្នុងវិស័យអចលនទ្រព្យ ដែលមានតម្លៃកាន់តែថោកដោយសារការធ្លាក់ចុះសេដ្ឋកិច្ចនេះ។
៦. ត្រូវមានការរៀបចំបង្កើតអាជីវកម្មមួយឲ្យបានត្រឹមត្រូវ
អាជីវកម្មដែលបានរៀបចំបង្កើតឡើងយ៉ាងត្រឹមត្រូវមិនតម្រូវឲ្យអ្នកបន្តរកទុនបន្ថែមនោះទេ។ ផ្ទុយមកវិញ វាមានសមត្ថភាពក្នុងការរកទុនបន្ថែមបានដោយស្វ័យប្រវត្តិ។ គ្មាននរណាម្នាក់នឹងវិនិយោគជាមួយផលិតផលរបស់អ្នកនោះទេ ប្រសិនបើអ្នកមានអាជីវកម្មមួយដែលបង្កើតឡើងដោយទន់ខ្សោយ និងមានមានការរៀបចំមិនបានល្អនោះ។
៧. ត្រូវដឹងនូវអ្វីដែលអ្នកកំពុងតែខិតខំប្រឹងប្រែងធ្វើដើម្បីយកឲ្យបាន
វាពិតជាមានសារៈសំខាន់ណាស់ដែលត្រូវដឹងថាតើ ប្រភេទនៃប្រាក់ចំណូលអ្វីដែលអ្នកកំពុងតែខិតខំប្រឹងប្រែងធ្វើការដើម្បីទទួលបាន។ បុគ្គល អ្នកមានការងារធ្វើភាគច្រើនបំផុត ធ្វើការដើម្បីទទួលបានប្រាក់ចំណូលដែលត្រូវបានបង់ពន្ធយ៉ាងច្រើនទៅឲ្យរដ្ឋាភិបាល នៅពេលដែលពួកគេ អាចរកចំណូលអកម្ម (passive income) បានដែលជាប្រាក់ចំណូលគោលទៀងទាត់មួយ តាមរយៈការចាប់ផ្តើមបោះជំហ៊ានចូលក្នុងវិស័យសហគ្រិនភាព។
៨. កុំខ្លាចការខាតបង់
អ្នកនឹងមិនអាចទៅមុខបាននោះទេ ប្រសិនបើអ្នកខ្លាចការខាតបង់។ យើងទាំងអស់គ្នាបានគិតនៅក្នុងសាលាថា ប្រសិនបើយើងបង្កើតកំហុស យើងពិតជាបរាជ័យ ប៉ុន្តែនោះមិនមែនជាជីវិតពិតនោះទេ។ ប្រសិនបើអ្នកខ្លាចក្នុងការបង្កើតកំហុស នោះអ្នកនឹងមិនអាចទទួលបានជោគជ័យ នោះទេ។
៩. ត្រូវមានគោលបំណងទិញទ្រព្យបន្ថែម
អាជីវកម្មដែលមានការរៀបចំបានល្អតែងតែបង្កើននូវចំនួនទ្រព្យរបស់ខ្លួន។ ប្រសិនបើអាជីវកម្មរបស់អ្នកត្រូវបានផ្តោតលើការទិញទ្រព្យបន្ថែម ដូច្នេះអ្នកវិនិយោគនឹងផ្តល់លុយឲ្យអ្នក ពីព្រោះអ្នកមានការរៀបចំអាជីវកម្មមួយបានល្អ។
១០. ឈប់សន្សំលុយ ត្រូវការពារវា
ទោះបីជាការសន្សំលុយ គឺជាគំនិតឆ្លាតវៃក៏ដោយ ក៏វាពិតជាមានសារៈសំខាន់ដែលត្រូវចងចាំថា មនុស្សដែលសន្សំលុយមិនអាចសន្សំឡើងស្មើនឹងការឡើងចុះតម្លៃរបស់រូបិយវត្ថុនោះដែរ ដែលវានឹងមានទំនោធ្វើឲ្យអំណាចការទិញរបស់ពួកគេធ្លាក់ចុះ។ ផ្ទុយមកវិញ វាពិតជាល្អប្រសើរក្នុងការការពារលុយ (hedge money) ហើយរំពឹងថាការឡើងចុះបែបនោះនឹងធ្វើឲ្យមានការវិនិយោគដ៏ឆ្លាតវៃកើតមានឡើង ៕