៣ឆ្នាំសោះ ទាហាននិងប៉ូលិសអាហ្វហ្គានីស្ថានស្លាប់ជិត៣ម៉ឺននាក់ ដោយសារសង្គ្រាមជាមួយអាមេរិក
អាហ្វហ្គានីស្ថាន៖ប្រធានាធិបតីអាហ្វហ្គានីស្ថាន លោក Ashraf Ghani បាននិយាយថា ទាហាននិងប៉ូលិសអាហ្វហ្គានីស្ថានជាង២៨០០០នាក់ត្រូវបានសម្លាប់ចាប់តាំងពីឆ្នាំ២០១៥ មក ដោយសារសង្គ្រាមជាមួយអាមេរិក ។
ដោយឡែក នៅថ្ងៃទី៦ ខែធ្នូ នេះ សារព័ត៌មានចិន ស៊ីនហួរ ចេញផ្សាយថា មេបញ្ជាការកណ្ដាល នៃបញ្ជាការដ្ឋានកណ្តាលអាមេរិកហៅកាត់ថា CENTCOM បានសម្តែងការព្រួយបារម្ភអំពីអត្រាកើនឡើងនៃការស្លាប់របស់កងកម្លាំងអាមេរិកដែលកំពុងឈរជើងនៅក្នុងប្រទេសអាហ្វហ្គានីស្ថាន ខណៈការប្រយុទ្ធនៅក្នុងប្រទេសដែលហួងហែង ដោយសារសង្រ្គាមមួយនេះ កំពុងតែបន្តកើតមានស្ទើររៀងរាល់ថ្ងៃ។
ឧត្តមសេនីយ៍ឯក Kenneth McKenzie បាននិយាយថា “ការបាត់បង់នៃកងកម្លាំងសហរដ្ឋអាមេរិកមានកំរិតខ្ពស់ណាស់ ហើយការបាត់បង់របស់ពួកគេនឹងមិនមាននិរន្តរភាពទេ លុះត្រាតែយើងបានដោះស្រាយបញ្ហាមួយចំនួនអោយបានរួចរាល់”។
សូមបញ្ជាក់ថា លោក McKenzie ត្រូវបានតែងតាំងអោយជំនួស ការចាកចេញរបស់ឧត្តមសេនីយ៍ឯក Joseph L. Votel ដើម្បីដឹកនាំ ក្រុម CENTCOM ។
លោកក៏បានទទួលស្គាល់ការស្លាប់របស់ ទាហានអាមេរិកនៅអាហ្វហ្គានីស្ថាននាពេលថ្មីៗនេះ និងការស្លាប់របស់មេបញ្ជាការកងនាវាចរទី ៥ លោក Scott Stearney នៅប្រទេសបារ៉ែនផងដែរ។
ការកត់សម្គាល់របស់លោក McKenzie បានកើតឡើងនៅពេលដែលក្រុងវ៉ាស៊ីនតោនបានបង្កើនកិច្ចខិតខំប្រឹងប្រែង ដើម្បីស្វែងរកដំណោះស្រាយដោយសន្តិវិធី ដើម្បីបញ្ចប់សង្រ្គាមដ៏រ៉ាំរៃនៅអាហ្វហ្គានីស្ថាន។
ក្នុងអំឡុងពេលសវនាការ សមាជិកសភាអាមេរិកក៏បានសម្តែងការខកចិត្តចំពោះការជាប់គាំង នៅក្នុងការចូលរួមរបស់កងទ័ពអាមេរិកនៅក្នុងសង្គ្រាមអាហ្វហ្គានីស្ថាន។
ចំនួនអ្នកស្លាប់នៃកងកម្លាំងអាមេរិកបានកើនឡើងលើសពី ២៤០០ នាក់ ចាប់តាំងពីសហរដ្ឋអាមេរិកបានឈ្លានពានអាហ្វហ្គានីស្ថាននៅឆ្នាំ២០០១ ។
តំណាងពិសេសរបស់សហរដ្ឋអាមេរិកសម្រាប់ការផ្សះផ្សាអាហ្វហ្គានីស្ថានលោក Zalmay Khalilzad បានធ្វើកិច្ចចរចារយៈពេល ៣ ថ្ងៃជាមួយបេសកជននយោបាយតាលីបង់កាលពីខែមុន។
ប៉ុន្តែមិនបានឈានដល់កិច្ចព្រមព្រៀងសន្តិភាពនោះទេ។ កិច្ចពិភាក្សាបន្តទៀត នឹងត្រូវបានគេរំពឹងថាធ្វើនៅក្នុុងខែធ្នូ ឆ្នាំ២០១៨នេះ៕