ខ្មែរ 
07
Nov
Nov
បឹងកេត ក្លាយជាម្ចាស់ជើងឯក Hun Sen Cup ជាលើកដំបូងក្នុងប្រវត្តិសាស្ត្ររបស់ក្លិប
ភ្នំពេញ៖ការប្រកួតរវាងក្លិបបាល់ទាត់ បឹងកេត និងក្លិបបាល់ទាត់ ព្រះខ័នរាជស្វាយរៀង វគ្គផ្តាច់ព្រ័ត្រនៃពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៣ ឆ្នាំ២០១៩ ថ្នាក់ជាតិ នៅកីឡដ្ឋាន ស្មាត អ.អេស.អិន កាលពីថ្ងៃទី៦ ខែវិច្ឆិកា វេលាម៉ោង ៦៖០០នាទីល្ងាចមិញនេះ បានបញ្ចប់ដោយភាពជោគជ័យ ក្រោមអ្នកទស្សនាផ្ទាល់ជាង ៦ពាន់នាក់។
ការប្រកួតដ៏ជក់ចិត្ត តានតឹង និងស្វិតស្វាញមែនទែន ក្នុងនោះពេញ៩០នាទីក្រុមទាំងពីររកបាន១គ្រាប់ដូចគ្នា។ ក្រុមមកពីខេត្តស្វាយរៀងខាងលើបានដាក់សម្ពាធខ្លាំងមកលើបឹងកេត ក្រោយខ្សែការពារ សេត រ៉ូស៊ីប របស់បឹងកេត ទទួលកាត់ក្រហមនៅនាទីទី៧០ ហើយក្រុមខ្លួនមានគ្នារហូត១១នាក់។
ការប្រកួតឈានដល់ការបន្ថែមម៉ោង១៥នាទី២ដង ដើម្បីស្វែងរកក្រុមឈ្នះបានក្លាយជាម្ចាស់ពាន Hun Sen Cup រដូវកាលនេះ ប៉ុន្តែពួកគេនៅតែមិនអាចរកគ្រាប់បាល់បន្ថែមទៀតបាន ដោយបឹងកេតព្យាយាមទប់ខ្លាំង និងវាយបកខ្លះ។ ការប្រកួតរវាងបឹងកេត និងព្រះខ័នរាជក៏បន្តដល់ការទាត់បាល់កាត់សេចក្ដី១១ម៉ែត្រទើបអាចរកឃើញម្ចាស់ពានរង្វាន់នោះគឺបានលើក្រុមបឹងកេត។
ការទាត់បាល់ ១១ម៉ែត្រដំបូង ធ្វើឡើងដោយខ្សែប្រយុទ្ធចាស់វស្សា កីឡាករ ឃួនឡា បូរ៉ាវី មិនបានសម្រេច ត្រូវសង្គ្រោះបាល់បានដោយអ្នកចាំទីស្វាយរៀង ធ្វើឲ្យបឹងកេតស្ទើរតែអស់សង្ឃឹមទៅហើយ ប៉ុន្តែក្រោយពីខ្សែប្រយុទ្ធ ម៉ាត់ ណូរ៉ុន តាមពីក្រោយស្វាយរៀងវិញ និងស៊ុតជាបន្តបន្ទាប់រវាងក្រុមទាំងពីរ អ្វីដែលអស្ចារ្យនោះ អ្នកចាំទីបឹងកេតអាចជួយសង្គ្រោះបាល់បានពីរលើក និងជាគ្រាប់ជ័យជំនះក្នុងលទ្ធផល ៦ ទល់នឹង៥ ក្លាយជាម្ចាស់ពាន Hun Sen Cup ឆ្នាំ២០១៩ នេះតែម្ដង។
សូមជម្រាបថា ក្លិបបាល់ទាត់ បឹងកេត បានក្លាយជាម្ចាស់ជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន ជាលើកដំបូងបំផុតក្នុងប្រវត្តិសាស្ត្រក្លិបនេះ និងម្ចាស់ជើងឯកលីគកំពូលកម្ពុជាចំនួនបីសម័យកាល ពោលតាំងពីឆ្នាំ ២០១២, ២០១៦, និង២០១៧៕
