ភ្នំពេញ៖ ក្រោយបញ្ចប់ដំណើរទស្សនកិច្ច និងពិភាក្សាការងារអស់រយៈពេល ២ថ្ងៃរបស់រដ្ឋមន្ត្រីក្រសួងការបរទេសចិន កម្ពុជា និងចិនសម្រេចបាននូវកិច្ចព្រមព្រៀងពាណិជ្ជកម្មសេរី រួមជាមួយឯកសារសំខាន់ចំនួន ៣បន្ថែមទៀតប្រកបដោយភាពជោគជ័យ។

ការចុះកិច្ចព្រមព្រៀងនេះ បានប្រារព្ធឡើងក្រោមអធិបតីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា រួមជាមួយលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន នៅថ្ងៃទី១២ ខែតុលា ឆ្នាំ២០២០នេះ។

ឯកសារសំខាន់ៗទាំង ៤នោះរួមមាន៖

១. កិច្ចព្រមព្រៀងពាណិជ្ជកម្មសេរីរវាងសាធារណរដ្ឋប្រជាមានិតចិន និងព្រះរាជាណាចក្រកម្ពុជា

២. កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសសម្រាប់ការផ្តល់ហិរញ្ញប្បទានឥតសំណង ទឹកប្រាក់ ៩៥០លានយ័ន

៣. លិខិតប្តូរឯកសារស្តីពីការសិក្សាសមិទ្ធលទ្ធភាពគម្រោងធ្វើឱ្យប្រសើរឡើងមន្ទីរពេទ្យបង្អែកខេត្តព្រះសីហនុ

៤. លិខិតឯកសារស្តីពីការសិក្សាសមិទ្ធិលទ្ធផលគម្រោងអភិវឌ្ឍន៍ហេដ្ឋារចនាសម្ព័ន្ធ ប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ និងពិធីប្រគល់ទទួលជំនួយឧបករណ៍វេជ្ជសាស្រ្តពីមិត្តចិន។

សូមជម្រាបថា ចិន និងកម្ពុជាគ្រោងជំរុញ​ទំហំពាណិជ្ជកម្មទ្វេភាគីឱ្យបានដល់ ១០ពាន់លាន​ដុល្លារអាមេរិក នៅឆ្នាំ២០២៣​ខាងមុខ​នេះ។

កាលពីឆ្នាំ២០១៩​ ទំហំពាណិជ្ជកម្ម​រវាង​កម្ពុជា-ចិន សម្រេចបាន​ដល់ប្រមាណជាង ៨ពាន់លាន​ដុល្លារ កើនឡើង​២៧% ធៀបនឹងឆ្នាំ២០១៨។ កម្ពុជា​នាំ​ចេញ​ទំនិញ​ទៅប្រទេស​ចិន​គិត​ជា​ទឹក​ប្រាក់​កើន​ឡើង​ដល់​១ពាន់លាន​ដុល្លារ ខណៈ​​នាំ​ចូល​ពីចិនវិញក្នុង​​ទឹក​ប្រាក់​ជិត​៧​ពាន់​លាន​ដុល្លារ។ ភាគ​ច្រើន​នៃ​ទំនិញ​នាំចូល​ពី​ចិន​ជា​គ្រឿង​ចក្រ​បំរើ​ឲ្យ​តម្រូវ​ការ​ផ្នែក​សំណង់ រីឯ​ទំនិញ​កម្ពុជា​នាំ​ចូល​ទៅ​ចិន​ភាគ​ច្រើន​ជាផលិតផល​កសិកម្ម៕