ខ្មែរ 
CPC-នគរបាលឃាត់ខ្លួនជនសង្ស័យចំនួន៧នាក់ ពាក់ព័ន្ធករណីកាប់ប្លន់យកទ្រព្យសម្បត្តិ បណ្តាលឲ្យជនរងគ្រោះរងរបួស
ភ្នំពេញ៖កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំបង្ក្រាបករណីលួចមានស្ថានទម្ងន់ទោស(កាប់ប្លន់យកទ្រព្យសម្បត្តិ និងបណ្តាលឲ្យរងរបួស) ក្នុងភូមិសាស្រ្តរាជធានី/ខេត្ត ជាច្រើនលើកកន្លងមក នាពេលរាត្រី ពោលគឺកាលពីថ្ងៃទី ១០ ខែកុម្ភ: ឆ្នាំ២០២៤ វេលាម៉ោង ០៤: ០០ នាទីមានករណីលួចមានស្ថានទម្ងន់ទោស ដោយប្រើកាំបិតកាប់ទៅលើបុរសជនជាតិកូរ៉េ ឲ្យរងរបួសត្រង់ចំណុច ថ្ពាល់ខាងឆ្វេង ដោយបានយកប្រាក់មួយចំនួន1300$ និង ទូរស័ព្ទចំនួន០១ ម៉ាក IPhone 13Promax។
ដោយអនុវត្តតាមបទបញ្ជាយ៉ាងម៉ឺងម៉ាត់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ, អគ្គស្នងការរងទទួលផែន,អគ្គស្នងការរងទទួលនាយកដ្ឋាននគរបាលព្រហ្មទណ្ឌ និងឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានបញ្ជាកម្លាំងបើកការស្រាវជ្រាវភ្លាមៗ។ ក្រោយទទួលបានបទបញ្ជា លោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាននគរបាលព្រហ្មទណ្ឌ បានដឹកនាំសហការជាមួយកម្លាំងជំនាញរបស់អធិការដ្ឋាននគរបាលខណ្ឌសែនសុខ ដោយប្រើវិធានការជំនាញធ្វើការស្រាវជ្រាវតាមនីតិវិធី រហូតកំណត់បានទីតាំងលាក់ខ្លួនរបស់ជនសង្ស័យខាងលើ។
លុះដល់ថ្ងៃទី១២ ខែកុម្ភៈ ឆ្នាំ២០២៤ វេលាម៉ោង១៥និង៣០នាទី កម្លាំងរបស់នាយកដ្ឋាននគរបាលព្រហ្មទណ្ឌ បានបន្តដឹកនាំសហការដោយឃាត់ខ្លួនបាន ត្រង់ចំណុច ផ្លូវបេតុង ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ ចំនួន ៧នាក់ ដូចខាងក្រោម ៖១. ឈ្មោះ ពេញ សុភណ្ឌ ភេទប្រុស អាយុ ១៦ឆ្នាំ២. ឈ្មោះ ណុប ដាវីត ភេទប្រុស អាយុ ១៥ឆ្នាំ៣. ឈ្មោះ ផល សម្ភស់ ភេទប្រុស អាយុ ១៥ឆ្នាំ៤. ឈ្មោះ សុខ ធាសុភា ភេទប្រុស អាយុ ១៥ឆ្នាំ ៥. ឈ្មោះ ហាក់ ម៉េងឈី ភេទប្រុស អាយុ ១៦ឆ្នាំ៦. ឈ្មោះ សម្បត្តិ សន្យា ភេទប្រុស អាយុ ១៥ឆ្នាំ ៧. ឈ្មោះ អាន ដេវីត ភេទប្រុស អាយុ ១៦ឆ្នាំ ជនជាតិខ្មែរ ។
បន្ទាប់ពីបានធ្វើការសាកសួរបឋមជនសង្ស័យទាំង ៧នាក់ខាងលើ បានឆ្លើយសារភាពថា ពួកខ្លួនពិតជាបានធ្វើសកម្មភាពកាប់ប្លនទៅលើជនជាតិកូរ៉េបណ្តាលឲ្យរងរបួស កាលពីថ្ងៃទី១០ ខែកុម្ភ: ឆ្នាំ២០២៤ ប្រាកដមែន ។
បច្ចុប្បន្ននាយយកដ្ឋាននគរបាលព្រហ្មទណ្ឌបានប្រគល់ជនសង្ស័យខាងលើឲ្យទៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនិតិវិធីបន្ត ៕
