កំពូលកីឡាករបាល់ទាត់ផ្ញើសារលើកទឹកចិត្តដល់ក្រុមគ្រូពេទ្យក្នុងការយកចិត្តដាក់ព្យាបាលអ្នកផ្ទុកវីរុសកូរ៉ូណា ខណៈវីរុសនេះកំពុងបន្តការរាលដាលយ៉ាងខ្លាំងក្លា
អ៊ីតាលី៖ខណៈដែលជំងឺរលាកសួតប្រភេទថ្មី បាននឹងកំពុងរីករាលដាលនៅទូទាំងសកលលោក ហើយក្លិបបាល់ទាត់នៅអឺរ៉ុបមួយចំនួនធំបានសម្រេចផ្អាកការប្រកួតជាបន្តបន្ទាប់ ក្រោយខ្សែការពារក្រុមសេះបង្កង់ JUVENTUS កីឡាករ Daniele Rugani បានឆ្លងវីរុស Covid-19 រួចមកកំពូលកីឡាករបាល់ទាត់ឆ្នើម Cristiano Ronaldo ផ្ញើសារដ៏ក្ដុកក្ដួលទៅកាន់ប្រជាជនជុំវិញពិភពលោកឲ្យធ្វើតាមការណែនាំរបស់អង្គការសុខភាពពិភពលោក ចៀសវាងការឆ្លងជំងឺ Covid-19។
Cristiano Ronaldo សរសេរនៅបណ្ដាញសង្គមហ្វេសប៊ុកផ្ទាល់ខ្លួនម្សិលមិញនេះថា “ពិភពលោកកំពុងឆ្លងកាត់គ្រាដ៏លំបាកដែលទាមទារការយកចិត្តទុកដាក់ខ្ពស់បំផុតពីយើងទាំងអស់គ្នា។ ខ្ញុំនិយាយទៅកាន់អ្នកនៅថ្ងៃនេះ មិនមែនក្នុងនាមជាកីឡាករបាល់ទាត់ទេ ប៉ុន្តែក្នុងនាមជាកូនប្រុស ជាឪពុក ជាមនុស្សជាតិដែលមានការព្រួយបារម្ភជាមួយនឹងការវិវត្តន៍ចុងក្រោយដែលកំពុងជះឥទ្ធិពលដល់ពិភពលោកទាំងមូល” ។
កំពូលខ្សែប្រយុទ្ធរូបនេះបន្តថា វាពិតជាសំខាន់ណាស់ដែលយើងទាំងអស់គ្នាអនុវត្តតាមវិធានការរបស់អង្គការសុខភាពពិភពលោក (WHO) និងអង្គភាពនានាស្តីអំពីវិធីដែលយើងអាចគ្រប់គ្រងស្ថានការណ៍សម្រាប់បច្ចុប្បន្នភាពនេះ។ ការពារអាយុជីវិតមនុស្សត្រូវតែជាចំណុចដំបូងបង្អស់ដែលយើងគ្រប់គ្នាគួរគិតគូរ។
ខ្ញុំចង់ផ្ញើទៅកាន់មនុស្សគ្រប់គ្នាដែលបានបាត់បង់នរណាម្នាក់ដែលជិតស្និទ្ធ សាមគ្គីភាពរបស់ខ្ញុំចំពោះអ្នកដែលកំពុងប្រយុទ្ធជាមួយវីរុសនេះ ដូចជាមិត្តរួមក្រុមរបស់ខ្ញុំ Daniele Rugani នឹងបន្តការគាំទ្រដល់អ្នកជំនាញសុខភាព ដែសុខចិត្តដាក់ជីវិតរបស់ពួកគេប្រឈមនឹងហានិភ័យដើម្បីជួយសង្រ្គោះអ្នកដទៃ។
ជាមួយគ្នានោះដែរ ខ្សែបម្រើប្រយុទ្ធកាំភ្លើង Arsenal កីឡាករ Mesut Ozil សរសេរសារតាមTwitter ថា “ក្នុងគ្រាដែលពួកយើងជួបប្រទះនូវបញ្ហាជាសកលបែបនេះ យើងមិនគួរភ្លេចអរគុណដល់ក្រុមគ្រូពេទ្យ គិលានុបដ្ឋាយិកា អ្នកវិទ្យាសាស្រ្ត និងផ្នែកផ្សេងៗទៀត ដែលបានខិតខំស្វះស្វែងប្រយុទ្ធប្រឆាំង និងទប់ស្កាត់ជំងឺឆ្លងមួយនេះដើម្បីពួកយើងឡើយ។ កីឡាកររូបនេះបន្តថា ពួកគាត់មានសម្ពាធខ្លាំងណាស់នៅប៉ុន្មានសប្តាហ៍មកនេះ ហើយពួកគាត់ពិតជាសាកសមទទួលបានក្តីគោរព និងកាដឹងគុណពីពួកយើងគ្រប់ៗរូប”។
សូមជម្រាបថា គិតត្រឹមថ្ងៃទី១៤ ខែមីនា ឆ្នាំ២០២០ នេះ មានអ្នកផ្ទុកវីរុសកូរ៉ូណា ឬ កូវីដ-១៩ ចំនួន ១៤៥,៨៧០នាក់ និងមានអ្នកមនុស្សស្លាប់ដោយសារវីរុសចំនួន ៥,៤៣៨នាក់ ខណៈអ្នកជាសះស្បើយមានចំនួន ៧២,៥៥១នាក់៕
![](https://www.cpc-news.com/wp-content/uploads/2020/03/5o9t62ng_cristiano-ronaldo-sad-juventus-afp_625x300_21_January_19.jpg)
![](https://www.cpc-news.com/wp-content/uploads/2020/03/6afdf69f3f825d86fb57ccd40eab0e63.jpg)
![](https://www.cpc-news.com/wp-content/uploads/2020/03/photo_2020-03-14_15-47-30-819x1024.jpg)
![](https://www.cpc-news.com/wp-content/uploads/2020/03/photo_2020-03-14_15-47-33.jpg)