ភ្នំពេញ៖មុនជំនួបជើងទី២ នៃពានរង្វាន់សម្តេចអគ្គមហាសេនាបតីតេជោ ហ៊ុន សែន ជាមួយក្លិបបាល់ទាត់ ណាហ្គាវើលដ៍ នៅថ្ងៃទី១៨ ខែកក្កដា ស្អែកនេះ ក្លិបបាល់ទាត់ គិរីវង់សុខសែនជ័យ បង្ហាញភាពមិនប្រាកដប្រជាពីជ័យជម្នះនោះទេ ខណៈដែលជើងទី១ គិរីវង់ ធ្វើបានយ៉ាងល្អដោយយកឈ្នះណាហ្គាវើលក្នុងលទ្ធផល ២ទល់នឹង០។

មុនការប្រកួតថ្ងៃស្អែកនេះ គ្រូបង្វឹកក្លិបបាល់ទាត់ គិរីវង់សុខសែនជ័យ លោក Ekapob Potisai បានបង្ហើបប្រាប់CNCC ថា “យើងបានរៀបចំតាក់ទិចដើម្បីជម្រុញប្រសិទ្ធភាពកីឡាកររបស់យើង។ ការប្រកួតជើងទី២នេះ ធ្វើនៅក្រៅទឹកដី ដូច្នេះយើងនឹងត្រូវព្យាយាមខ្លាំងជាងជើងទី១។ ខ្ញុំព្យាយាមបង្វឹកកីឡាកររបស់យើងរាល់ថ្ងៃ ដើម្បីឲ្យពួកគេថ្នឹកនឹងអ្វីដែលយើងត្រូវធ្វើតាមតាក់ទិចរបស់យើង។ ខ្ញុំគិតថា គ្រប់គ្នាអាចធ្វើបានហើយអាចរកជ័យជម្នះដើម្បីឡើងទៅជុំបន្ត“។

ដោយឡែកគ្រូបង្វឹកក្លិបបាល់ទាត់ ណាហ្គាវើល លោក មាស ចាន់ណា ឯនោះវិញ បានបង្ហាញការប្តេជ្ញាចិត្តថា កូនក្រុមរបស់លោកនឹងធ្វើបានល្អវិញ នៅជើងទី២នេះ ហើយលោកនឹងដាក់កីឡាករល្អៗបំផុតរបស់ក្រុម និងកីឡាករដែលមានបទពិសោធច្រើនចូលលេង ដើម្បីស្តាលទ្ធផលឡើងវិញ ក្រោយភ្លាត់ស្នៀតចាញ់ គិរីវង់សុខសែនជ័យរហូតដល់ ២គ្រាប់ក្នុងជើងទី១ កន្លងទៅ៕ ដោយ៖ស្រ៊ីប ឡានី