ខ្មែរ 
CPC-ករណីគ្រោះថ្នាក់ចរាចរណ៍រវាងរថយន្ត និងម៉ូតូបុកគ្នាពេញទំហឹង បណ្ដាលឪ្យយុវជន២នាក់ស្លាប់ក្នុងថ្លុកឈាម
ភ្នំពេញ៖ យ៉ាងហោចណាស់មានយុវជន២នាក់បាត់បងជិវិតភ្លាមៗ ក្នុងករណីគ្រោះថ្នាក់ចរាចរណ៍រវាងរថយន្ត និងម៉ូតូបុកគ្នាពេញទំហឹង ការពីវេលាម៉ោង២នឹង៤០នាទីយប់ ថ្ងៃទី១៨ ខែមេសា ឆ្នាំ២០២៤ នៅត្រង់ចំណុចស្តុបណតប្រីដ ស្ថិតលើផ្លូវ២០០៤ កែង ផ្លូវណតប្រីដ ស្ថិតនៅភូមិអ័រគីដេរ សង្កាត់ទអូរបែកក្អម ខណ្ឌសែនសុខ រាជធានីភ្នំពេញ។
ជនរងគ្រោះទាំង២នាក់ជាកម្មករសំណង់ ក្នុងនោះម្នាក់ឈ្មោះ មន ចាន់ថេង ភេទប្រុស អាយុ១៩ឆ្នាំ ស្នាក់នៅកន្លែងធ្វើការនៅភ្នំពេញ មានស្រុកកំណើតនៅឃុំស្វាយជ្រុំ ស្រុកមេសាង ខេត្តព្រៃវែង និងម្នាក់ទៀតឈ្មោះ តុលា បញ្ញា ភេទប្រុស អាយុ១៧ឆ្នាំ មានស្រុកំណើតនៅឃុំស្វាយជុំ ស្រុកមេសាង ខេត្តព្រៃវែង ។
តាមប្រភពព័ត៌មាននៅកន្លែងកើតហេតុបានអោយដឹងថា នៅមុនកើតហេតុ គេឃើញយុវជន២នាក់ជិះម៉ូតូមួយគ្រឿងម៉ាកហុងដាឌ្រីម ពណ៍ខ្មៅ ពាក់ស្លាកលេខ ភ្នំពេញ 2AV-3394 ធ្វើដំណើរតាមបណ្ដោយផ្លូវណតប្រីត ទិសដៅពីជើងទៅត្បូង ក្នុងល្បឿនលឿន លុះធ្វើដំណើរមកដល់ចំណុចស្ដុបណតប្រ៊ីដ ផ្លូវបំបែកជាបួនក៏ជ្រុលទៅបុករថយន្ដមួយគ្រឿង ម៉ាកនីស្សាន់ ពណ៍ស ពាក់ស្លាកលេខ ភ្នំពេញ 2BV-4371 បើកបរដោយនារីម្នាក់ ធ្វើដំណើរតាមបណ្ដោយផ្លូវ២០០៤ ក្នុងទិសដៅពីលិចទៅកើត បណ្ដាលអោយម៉ូតូហោះផ្លោងឆ្លងទៅផ្លូវម្ខាងទៀត រងការខូចខាតខ្ទេចស្ទើរទាំងស្រុង ចំណែកអ្នកបើកបរនឹងអ្នករួមដំណើរពីក្រោយ បានស្លា.ប់ភ្លាមៗទាំង២នាក់នៅនឹងកន្លែងកើតហេតុ ។ រីឯរថយន្ដរងការខូចខាត នឹងបែកកញ្ចក់មុខរងការខូចយ៉ាងធ្ងន់ធ្ងរ ចំណែកអ្នកបើកបរជានារី ត្រូវបានសមត្ថកិច្ចឃាត់ខ្លួនបញ្ជូនទៅកាន់ប៉ុស្តិ៍អូរបែកក្អមភ្លាមៗ។
ក្រោយពីកើតហេតុ សមត្ថកិច្ចចរាចរណ៍ខណ្ឌបានទាក់ទងទៅកំលាំងសមត្ថកិច្ចនគរបាលរាជធានីភ្នំពេញធ្វើការវ៉ាស់វែង រួចស្ទូចរថយន្ដនឹងម៉ូតូយកទៅរក្សាទុក ដើម្បីរង់ចាំការដោះស្រាយនៅពេលក្រោយ ។ ចំណែកសពជនរងគ្រោះត្រូវបានសមប្រគល់ជូនក្រុមគ្រួសារ ដឹកយកទៅធ្វើបុណ្យតាមប្រពៃណីនៅឯស្រុកកំណើត ៕
