អង់គ្លេស៖គេហទំព័រ The sun ចុះផ្សាយថា ហង្សក្រហម Liverpool ចង់ឲ្យកីឡាករដែលមានតម្លៃខ្ពស់បំផុតនៅ Premier League ខ្សែប្រយុទ្ធ Mohamed Salah មានកិច្ចសន្យាថ្មីនូវទំហំទឹកប្រាក់ចំនួន ២២,៤ លានផោនក្នុងមួយឆ្នាំ។

ដោយឡែករបាយការណ៍ពីអេស្ប៉ាញបានបង្ហាញថា ខ្សែប្រយុទ្ធរបស់អេហ្ស៊ីបរូបនេះ ក្រុមអធិរាជស Real Madrid ធ្លាប់ទាក់ទងកាលពីដើមរដូវកាលក្តៅ ដោយឲ្យតម្លៃខ្ពស់បំផុតគឺ ៤៣០,០០០ ក្នុងមួយសប្តាហ៍។

ករណីក្រុមអធិរាជស ផ្តល់តម្លៃច្រើនខ្លាំងបែបនេះចំពោះខ្សែប្រយុទ្ធឆ្នើមរបស់ហង្សក្រហម ធ្វើឲ្យLiverpool ពិចារណារឿងតម្លៃខ្លួនរបស់ Salah បន្ថែមទៀត ខណៈ Salah បានចុះកុងត្រាជាមួយហង្សក្រហមរហូតដល់ឆ្នាំ២០២៣ កាលពីរដូវកាលមុន។

គួររម្លឹកថា ខ្សែប្រយុទ្ធឆ្នើមរបស់ក្លិបLiverpool កីឡាករ Mohamed Salah ស៊ុតបញ្ចូលទីបាន ៥៤គ្រាប់ ក្នុង ៧៤ប្រកួតនៅ Premier League ចាប់តាំងខ្សែប្រយុទ្ធរូបនេះចូលរួមជាមួយហង្សក្រហម និងជួយក្រុមឈ្នះពានទ្វីបអឺរ៉ុបរដូវកាល២០១៩៕ ដោយ៖ស្រ៊ីប ឡានី