Paul Pogba ប្រកាសចូលនិវត្តន៍ពីក្រុមបាល់ទាត់ជម្រើសជាតិបារាំង ក្រោយប្រធានាធិបតីបារាំងថ្លែងសារប្រមាថដល់សាសនាឥស្លាម
ប៉ារីស៖ខ្សែបម្រើរបស់ក្លិបបាល់ទាត់បិសាចក្រហម មេនឆិស្ទើយូណាយធីត និងក្រុមបាល់ទាត់ជម្រើសជាតិបារាំងកីឡាករ Paul Pogba ត្រូវបានគេរាយការណ៍ថា បានចូលនិវត្តន៍ពីក្រុមបាល់ទាត់ជម្រើសជាតិបារាំងបន្ទាប់ពីលោកប្រធានាធិបតី អេម៉ានុយអ៊ែល ម៉ាក្រុង បានធ្វើការថ្លែងសារប្រមាថដល់ព្យាការី មូហាម៉ាត់ ដែលធ្វើឱ្យប៉ះពាល់យ៉ាងខ្លាំងដល់អ្នកកាន់សាសនាឥស្លាមនៅទូទាំងពិភពលោក។ នេះបើតាមការចុះផ្សាយដោយសារព័ត៌មាន The Sun នៅថ្ងៃទី២៦ ខែតុលា។
ប្រព័ន្ធផ្សព្វផ្សាយនៅមជ្ឈិមបូព៌ាបានធ្វើការចុះផ្សាយព្រោងព្រាតថា Pogba បានធ្វើការសម្រេចចិត្តចូលនិវត្តន៍ពីក្រុមបាល់ទាត់ជម្រើសជាតិបារាំង បន្ទាប់ពីការអត្ថាធិប្បាយរបស់លោក ម៉ាក្រុង ដែលសារមួយជាការរើសអើងជាតិសាសន៍ ប្រមាថព្យាការី មហាម៉ាត់ កាលពីថ្ងៃសុក្រកន្លងទៅ។
គេជឿជាក់ថា ការអត្ថាធិប្បាយរបស់ប្រធានាធិបតីបារាំង លោក ម៉ាក្រុង នឹងប៉ះពាល់យ៉ាងខ្លាំងទៅលើអ្នកកាន់សាសនាឥស្លាមនៅប្រទេសបារាំង និងនៅលើពិភពលោក មិនថាតែកីឡាករបាល់ទាត់ Paul Pogba នោះឡើយ។
គួរជម្រាបថា នៅក្នុងពិធីបុណ្យគោរពវិញ្ញាណក្ខន្ធ លោកគ្រូ Samuel Paty កាលពីថ្ងៃសុក្រកន្លងទៅ លោកប្រធានាធិបតីបារាំងបានបញ្ជាក់ថា “បារាំង នឹងមិនបោះបង់ចោលទម្លាប់គូររូបត្លុកនោះទេ”។
គឺពាក្យថា បារាំង “មិនឈប់គូររូបត្លុក”នេះហើយ ដែលធ្វើឲ្យប្រជាជនកាន់សាសនាឥស្លាមនៅក្នុងបណ្តាប្រទេសអារ៉ាប់ និងនៅលើពិភពលោកខឹងមិនសប្បាយចិត្ត និងបានប្រកាសធ្វើពហិការ មិនទិញទំនិញបារាំង។ តួកគី អ៊ីរ៉ង់ ហ្សកដានី កាតា និងកូវ៉ែតធ្លាប់បានចេញមុខបរិហាររិះគន់ការចុះផ្សាយ រូបត្លុក ព្យាការីមហាម៉ាត់ដែលមានប្រភពដើមចេញពីកាសែតបារាំង Charlie Hebdo។
អង្គការសហប្រតិបត្តិការឥស្លាម OIC ដែលប្រមូលផ្តុំប្រទេសកាន់សាសនាឥស្លាម បានសំដែងការសោកស្តាយ ដោយសារតែសំដីរបស់អ្នកទទួលខុសត្រូវបារាំង មួយចំនួន នឹងអាចប៉ះពាល់ដល់ទំនាក់ទំនង បារាំង និងប្រទេសកាន់សាសនាឥស្លាម។
នៅប្រទេសកាតារ ក្រុមហ៊ុនទទួលលក់ផលិតផលបារាំង បានប្រកាសថា ខ្លួននឹងដកផលិតផលបារាំង ចេញពីកន្លែងតាំងលក់ រហូតដល់មានការសម្រេចថ្មី។ សកលវិទ្យាល័យ នៅកាតារបានបញ្ជាក់ដែរថា ខ្លួនត្រូវផ្អាកព្យួរ ព្រឹត្តិការណ៍វិប្បធម៌បារាំង ដោយសារសំដីរបស់បារាំង បានទៅប៉ះពាល់អ៊ីស្លាម និងនិមិត្តរូបរបស់ឥស្លាម។
ទោះជាយ៉ាងណា មកទល់ពេលនេះទាំង Pogba និងសហព័ន្ធបាល់ទាត់បារាំង (FFF) មិនទាន់បានធ្វើសេចក្តីថ្លែងការណ៍ជាផ្លូវការស្តីពីបញ្ហានេះនៅឡើយទេ៕