ពលរដ្ឋ២៩២គ្រួសារ ដាក់ញត្តិជូនខុទ្ទកាល័យសម្តេចតេជោ និង ក្រសួងដែនដី សុំអន្តរាគមន៍ប្រឆាំងក្រុមហ៊ុនហេង អភិវឌ្ឍន៍ របស់លោកស្រីឧកញ៉ា សៀង ចាន់ហេង
ភ្នំពេញ៖តំណាងប្រជាពលរដ្ឋទាំង២៩២គ្រួសារ នៅថ្ងៃទី២៥ ខែមិថុនា នេះ ដាក់ញត្តិស្នើសុំអន្តរាគមន៍ពីខុទ្ទកាល័យសម្តេចតេជោនាយករដ្ឋមន្ត្រី និង លោកទេសរដ្ឋមន្រ្តី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ប្រឆាំងនឹងក្រុមហ៊ុនហេង អភិវឌ្ឍន៍ របស់លោកស្រីឧកញ៉ាសៀង ចាន់ហេង ។
ករណីនេះ លោកស្រីឧកញ៉ា សៀង ចាន់ហេង ស្នើបើកវេទិកាសាធារណៈមួយ ដើម្បីតតាំងគ្នាចំពោះមុខច្បាប់ ។
លោក អ៊ី វណ្ណា តំណាងពលរដ្ឋ និយាយថា ពលរដ្ឋមកសុំការអន្តរាគមន៍នាពេលនេះ មិនមែនក្នុងន័យនយោបាយឡើយ ហើយសូមកុំលាបពណ៌ប្រជាពលរដ្ឋដែលកំពុងរងគ្រោះជាមួយក្រុមហ៊ុន ហេង អភិវឌ្ឍន៍ ជាង១០ឆ្នាំមកហើយនោះ ។ គោលបំណងពិតប្រាកដនាពេលនេះ គឺស្នើសុំសម្ដេចតេជោ និង លោកទេសរដ្ឋមន្រ្តីជា សុផារ៉ា មេត្តារកយុត្តិធម៌ពិតប្រាកដដល់ពលរដ្ឋចំនួន២៩២គ្រួសារ ដែលគាំទ្រសម្ដេចជារៀងរហូតមក ។
លោកបន្តថា ក្រុមពលរដ្ឋចង់ឱ្យសម្តេចតេជោនាយករដ្ឋមន្ត្រី និង លោកទេសរដ្ឋមន្រ្តី ជា សុផារ៉ា ជួយរកយុត្តិធម៌ ដើម្បីបញ្ចប់ការផ្តល់ប័ណ្ណកម្មសិទ្ធិជាស្ថាពរលើទំហំដីចំនួន៤៥០ហិចតា ក្នុងសង្កាត់ព្រែកហូរ ក្រុងតាខ្មៅ និង ឃុំកណ្តោក , ឃុំជើងកើប ស្រុកកណ្តាលស្ទឹង ខេត្តកណ្តាល ដែលការផ្តល់ប័ណ្ណកម្មសិទ្ធិនេះ ត្រូវបានរាំងស្ទះដោយសារក្រុមហ៊ុនហេង អភិវឌ្ឍន៍ របស់លោកស្រីឧកញ៉ា សៀង ចាន់ហេង រំលោភលើដីប្រជាពលរដ្ឋ ។
ប្រជាពលរដ្ឋ និយាយថា ពួកគាត់បានមកអាស្រ័យផលលើដីនេះ តាំងពីឆ្នាំ១៩៨៧ មកម៉្លេះ ហើយក្រោយមកមានកំណើនច្រើនសរុប២៩២គ្រួសារ គឺ នៅឆ្នាំ១៩៩៣ ។
នៅឆ្នាំ២០០៤ ស្រាប់តែក្រុមហ៊ុន ហេង អភិវឌ្ឍន៍ របស់លោកស្រីឧកញ៉ា សៀង ចាន់ហេង មកប្ដឹងពួកគាត់ថា បានកាន់កាប់ដីរបស់ក្រុមហ៊ុនដោយខុសច្បាប់ តែតុលាការខេត្តកណ្ដាល កាត់ក្ដីឱ្យពលរដ្ឋឈ្នះក្ដីនេះ នៅឆ្នាំ២០០៦ ។
រយៈពេលជិតមួយឆ្នាំបន្ទាប់មក ស្រាប់តែមានលិខិតមកបញ្ជាក់ជាថ្មីថា ដីនេះ ជាកម្មសិទ្ធិរបស់លោកស្រីឧកញ៉ាសៀង ចាន់ហេង ទៅវិញ ។
មកដល់ឆ្នាំ២០០៩ ក្រុមហ៊ុនបានយកកម្លាំងអាវុធហត្ថប្រដាប់ដោយកាំភ្លើងគ្រប់ដៃ អមជាមួយគ្រឿងចក្រធុនយក្ស បានមកកម្ទេចដំណាំរបស់ពួកគាត់ ភ្លាមនោះក៏មានការតវ៉ាបានកើតឡើង ភ្លាមនោះដែរ ស្នូរកាំភ្លើងបាញ់រះតម្រង់មកប្រជាជន បណ្ដាលឱ្យមនុស្សរបួសពីរនាក់ ។
ប៉ុន្តែរហូតមកទល់ពេលនេះ អាជ្ញាធរបានផ្អាកការផ្តល់ប័ណ្ណកម្មសិទ្ធិជូនប្រជាពលរដ្ឋ ព្រោះតែក្រុមហ៊ុនហេង អភិវឌ្ឍន៍ បានរំលោភលើដីនេះយ៉ាងកម្រោល ដែលធ្វើជីវភាពរបស់ពួកយើងខ្ញុំ ខ្សត់ខ្សោយ ព្រោះតែមិនអាចអាស្រ័យផលលើដីទាំងនេះបានឡើយ ។
ក្រុមប្រជាពលរដ្ឋ ជឿជាក់និងសង្ឃឹមយ៉ាងមុតមាំ ថា សម្តេចតេជោ ពិតជាអាចជួយអន្តរាគមន៍ដល់ពួកគាត់បាន។
ពាក់ព័ន្ធករណីនេះ នៅថ្ងៃទី២៥ ខែមិថុនា លោកស្រី ឧកញ៉ា សៀង ចាន់ហេង អគ្គនាយិកាក្រុមហ៊ុនហេង អភិវឌ្ឍន៍ បដិសេធការចោទប្រកាន់នេះ ។
លោកស្រី អះអាងលើបណ្ដាញសង្គមហ្វេសប៊ុក ថា ក្រុមហ៊ុនយើងកំពុងរៀបចំលិខិតស្នើសុំក្រសួងដែនដីនគរូបនីយកម្មនិងសំណង់ សុំបើកវេទិការសាធារណៈមួយដើម្បីតតាំងគ្នាចំពោះមុខ ដោយយុតិធម៌ បើសិនជារកឃើញថា ក្រុមហ៊ុនរំលោភយកដីប្រជាពលរដ្ឋ២៩២គ្រួសារនោះក្រុមហ៊ុនសុខចិត្តទទួលទោសចំពោះមុខច្បាប់ ។ ប៉ុន្តែបើការរកនោះពុំឃើញថាក្រុមហ៊ុនរំលោភដីប្រជាជន២៩២ គ្រួសារនោះទេ សូមច្បាប់មេត្តាផ្តល់ត្រឡប់មកវិញនូវកិត្តិយស និង សេចក្តីថ្លៃថ្នូរដែលត្រូវបានក្រុម២៩២ គ្រួសារនេះបានបំផ្លាញ ៕