CPC-ប្រទះឃើញសពបុរសម្នាក់រលួយនៅសល់តែគ្រោងឆ្អឹង ក្នុងដីឡូតិ៍ខាងលិចស្ពានអាកាស៧មករា
![](https://www.cpc-news.com/wp-content/uploads/2024/02/photo_2024-02-27_16-13-23-991x564.jpg)
ភ្នំពេញ ៖ ប្រទះឃើញសពបុរសម្នាក់ស្លាប់រលួយនៅសល់តែគ្រោងឆ្អឹង ត្រូវបានប្រជាពលរដ្ឋប្រទះឃើញនៅក្រោមដើមឈើ ក្នុងដីឡូតិ៍មួយកន្លែងខាងលិចស្ពានអាកាស៧មករា ។ហេតុការណ៍ខាងលើនេះបង្កឱ្យមានការភ្ញាក់ផ្អើលកាលវេលាម៉ោង១០និង៣០ព្រឹកថ្ងៃទី២៧ ខែកុម្ភៈ ឆ្នាំ២០២៤ ស្ថិតក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
សពបុរសរូបនោះពុំត្រូវបានគេស្គាល់អត្តសញ្ញាណឡើយ ដោយមានសភាពរលួយសល់តែគ្រោងឆ្អឹង ស្លៀកខោកីឡាឆ្នូតពណ៏ស អាវក្រឡាការ៉ូ និង ក្រមាចងជាប់ដើមសង្កែ ។
តាមប្រភពព័ត៌មានបានឱ្យដឹងថា នៅព្រឹកថ្ងៃកើតហេតុ មានប្រជាពលរដ្ឋម្នាក់បានចូលទៅក្នុងព្រៃដីឡូតិ៍ គោលបំណងបត់ជើង តែក៏បានប្រទះឃើញគ្រោងឆ្អឹងមនុស្សនៅក្រោមដើមសង្កែក្នុងដីឡូតិ៍ ដោយមានក្រមាក្រហមចំនួន១ចងភ្ជាប់នឹងដើមនោះ ភ្លាមៗប្រជាពលរដ្ឋក៏បានរាយការណ៍ទៅនគរបាលមូលដ្ឋាន ដើម្បីទាក់ទងនគរបាលជំនាញចុះទៅត្រួតពិនិត្យ ។
បច្ចុប្បន្ននគរបាលជំនាញក៏បានចុះទៅត្រួតពិនិត្យ និងធ្វើកោសល្យវិច័យរួច បានដាក់ការសន្និដ្ឋានថា គ្រោងឆ្អឹងនោះជាមនុស្សប្រុស ហើយស្លាប់ដោយសារចងក ៕