អារ៉ាប៊ីសាអ៊ូឌីត ទាត់ចូលអេហ្ស៊ីបគ្រាប់ទី២ ធ្វើឱ្យពិធីករអត្ថាធិប្បាយ World Cup នៃទូរទស្សន៍អេហ្ស៊ីប គាំងបេះដូងស្លាប់
អេហ្ស៊ីប៖សារព័ត៌មាន MSN នៅព្រឹកទី២៧ ខែមិថុនា នេះ ផ្សាយថា អ្នកអត្ថាធិប្បាយបាល់ទាត់ទូរទស្សន៍អេហ្ស៊ីបម្នាក់ បានស្លាប់ដោយសារគាំងបេះដូងតែប៉ុន្មាននាទីប៉ុណ្ណោះ បន្ទាប់ពីក្រុមជម្រើសជាតិអារ៉ាប៊ីសាអ៊ូឌីតទាត់បាល់បញ្ជូលគ្រាប់ទី២ ដើម្បីផ្ដួលអេហ្ស៊ីបនៅចុងម៉ោង ក្នុងព្រឹត្តិការណ៍បាល់ទាត់ពិភពលោក World Cup ក្នុងពូល A កាលពីថ្ងៃចន្ទកន្លងទៅ។
លោក អាប់ឌែល រ៉ាហ៊ីម ម៉ូហាម៉េដ (Abdel Rahim Mohamed) ដែលជាអ្នកអត្ថាធិប្បាយ និងវិភាគកីឡាបាល់ទាត់ដ៏ល្បីម្នាក់នៅអេហ្ស៊ីប បាន បាត់បង់ស្មារតីភ្លាមៗនៅអំឡុងពេលអត្ថាធិប្បាយពីការប្រកួតរវាងអេហ្ស៊ីប និង អារ៉ាប៊ីសាអ៊ូឌីត ។
ជុំវិញហេតុការណ៍នេះ សារព័ត៌មាន Egypt Today ក៏បានឱ្យដឹងដែរថា លោក Mohamed បានទទួលរងការបះទង្គិចផ្លូវអារម្មណ៍ធ្ងន់ធ្ងរបំផុត នៅអំឡុងពេល និងនៅក្រោយការប្រកួត ជាពិសេសនៅពេលអារ៉ាប៊ីសាអ៊ូឌីត ទាត់បាល់បញ្ជូលទីនៅចុងម៉ោងយកឈ្នះអេហ្ស៊ីប ២-១ រហូតបានធ្វើឱ្យលោកគាំងបេះដូង ហើយត្រូវបញ្ជូនទៅកាន់មន្ទីរពេទ្យភ្លាមៗ ។
គួរបញ្ជាក់ថា ក្រុមគ្រូពេទ្យបានប្រើពេល៣០នាទី ដើម្បីជួយសង្គ្រោះលោក Mohamed តែមិនអាចជួយបាន ហើយក្រោយមកទើបគេបានប្រកាសថា លោកបានបាត់បង់ជីវិតទៅហើយ៕