ពលរដ្ឋអាមេរិក ប្រឈមបន្ទុកចំណាយកាន់តែច្រើនប្រមាណ ៤ ពាន់លានដុល្លារជារៀងរាល់ឆ្នាំលើស្បែកជើង ដែលកើតពីការដំឡើងពន្ធលើផលិតផលចិន
វ៉ាស៊ីនតោន៖ក្រុមហ៊ុនជាង ២០០ក្រុមហ៊ុន និងក្រុមអាជីវកម្មរាប់រយនាក់បានព្រមានពីការកើនឡើងការចំណាយរបស់ពលរដ្ឋអាមេរិក ដែលកើតចេញពីការធ្វើសង្គ្រាមពាណិជ្ជកម្មរបស់លោកប្រធានាធិបតី ដូ ណាត្រាំ។ នេះបើតាមការចុះផ្សាយដោយសារព័ត៌មាន Reuters នៅថ្ងៃទី២៩ ខែសីហានេះ។
តំណាងក្រុមហ៊ុនទាំងនោះបានលើកឡើងថា ការតម្លើងពន្ធនេះ គឺមិនមែនត្រឹមតែបន្ថែមសម្ពាធដល់ប្រទេសចិននោះទេ ប៉ុន្តែបានបន្ថែមបន្ទុកដល់ពលរដ្ឋអាមេរិកកាន់តែខ្លាំងឡើង។ ការបន្ថែម ១៥ ភាគរយលើផលិតផលស្បែកជើង នឹងពន្ធគយដែលមានជាមធ្យមចាប់ពី ១១ ភាគរយដល់ ៦៧ ភាគរយលើប្រភេទស្បែកជើងមួយចំនួន គឺបានធ្វើឲ្យការចំណាយរបស់អតិថិជន ដែលជាពលរដ្ឋអាមេរិកកើនឡើងដល់ ៤ ពាន់លានដុល្លារជារៀងរាល់ឆ្នាំ។
ក្នុងនោះក្រុមអាជីវកម្មជាង ១៦០ ក្រុមផ្សេងទៀត រួមមានសហព័ន្ធលក់រាយ សមាគមឧស្សាហកម្មលក់រាយ និងសមាគមអ្នកផលិតឧបករណ៍ ក៏បានជំរុញឱ្យលោក ត្រាំ ពន្យារពេលក្នុងការដំឡើងពន្ធគយ ដើម្បីបន្ធូរបន្ថយការចំណាយនារដូវការសម្រាកដើរទិញឥវ៉ាន់របស់ពលរដ្ឋអាមេរិកផងដែរ។
សូមជម្រាបថា ជម្លោះពាណិជ្ជកម្មរវាងអាមេរិក និងចិនបានពុះកញ្ជ្រោលឡើងកាលពីខែកក្កដា ឆ្នាំ២០១៨ ដែលធ្វើឲ្យមានការដំឡើងពន្ធលើផលិតផលគ្នាទៅវិញទៅមក ចុងក្រោយថ្មីៗនេះ លោក ត្រាំក៏បានទទួលស្គាល់ជាលើកដំបូងថា ការធ្វើសង្គ្រាមពាណិជ្ជកម្មជាមួយចិន ក៏ធ្វើឲ្យប៉ះពាល់ដល់សេដ្ឋកិច្ចជីវភាពរបស់ពលរដ្ឋអាមេរិកផងដែរ ក្នុងនោះជាដំណោះស្រាយ ដើម្បីបន្ធូរបន្ថយការលំបាក លោក ត្រាំ បានពន្យាពេលលើការដំឡើងពន្ធលើផលិតផលចិននៅខែធ្នូ ចុងឆ្នាំវិញ៕
![](https://www.cpc-news.com/wp-content/uploads/2019/08/photo_2019-08-29_15-21-05-2.jpg)
![](https://www.cpc-news.com/wp-content/uploads/2019/08/photo_2019-08-29_15-21-05-1.jpg)
![](https://www.cpc-news.com/wp-content/uploads/2019/08/photo_2019-08-29_15-21-06-2.jpg)
![](https://i2.wp.com/www.cpc-news.com/wp-content/uploads/2019/08/photo_2019-08-29_15-21-06.jpg?fit=1000%2C666&ssl=1)
![](https://i0.wp.com/www.cpc-news.com/wp-content/uploads/2019/08/photo_2019-08-29_15-21-07.jpg?fit=1000%2C666&ssl=1)